Piglalaoman na dadagsaon nin mga deboto an banwaan nin Gainza, Camarines Sur, huli sa “Tolong Hinulid” ngunyan na Semana Santa.
Sa intrevista kan Bombo Radyo Naga ki PCPT Sheralyn E. Samonte, Acting Chief of Police, Gainza Municipal Police Station, sinabi kaini na preparado na an pulisya tanganing siertohon an siguredad kan mga mapartisipar sa saindang aktibidad ngunyan na Semana Santa.
Pig-esplikar man ni Samonte na parte ini kan tradisyunal na pag-obserbar kan Semana Santa na kun sain liwat na isinasabuhay an pagpako sa krus ni Hesus. Dugang pa kaini na nakaantabay na an mga otridad tanganing maibitaran an anuman na insidente sa tahaw kan pinaglalaoman na pagdagsa kan mga deboto kan Tolong Hinulid.
Naglatag na man nin mga lakdang an lokal na gobyerno katuwang an manlaen-laen na ahensya tanganing masierto an marhay na daloy kan trapiko asin kaligtasan kan publiko sa mga lugar na pagkukundusiran kan aktibidad.
Padagos man an pagpagirumdon kan pulisya sa mga deboto na magsunod sa mga panundon asin maging mapagmatyag tanganing maging ligtas asin toninong an pag-obserbar kan Semana Santa.
