Nagpakol na sa 34 water meters an nairehistro na nahabon sa Metropolitan Naga Water District (MNWD) poon kan Enero hasta Hulyo 14.
Sa intrevista kan Bombo Radyo Naga kay Choppy Dy-Liacco Dela Cruz (Public Information Officer, Metropolitan Naga Water District), kadaklan sa mga insidente nairehistro sa mga barangay kan Concepcion Pequeña, Concepcion Grande, asin Balatas, mantang igwa man nin kaso sa Canaman asin Camaligan.
Segun ki De la Cruz, pigdududahan na ipinapabakal sa mga junk shop an mga hinabon na metro huli ta gibo sa bronse, na halangkaw an kantidad komo scrap. Huli kaini, nangapodan an MNWD sa mga junk shop owners na dae na magbakal nin mga metro nin tubig na pigdududahan na hinabon tanganing dae maimbwelto sa kaso.
Nakipagkoordinar man an MNWD sa Naga City Police Office para mas mapakusog an kampanya kontra sa paghabon nin metro. Segun sa opisyal, igwa nin suspechado na duwang beses nang nadakop asin kinasuhan, alagad nagpiyansa na asin nakaluwas na.
Inabisuhan kan MNWD an mga konsumedores na tulos na magreport sa saindang opisina asin mag-file nin blotter sa pulis kun nahabon an saindang kuntador nin tubig. Sinabi ninda na an pagsalida kan metro magkakantidad nin poco mas o menos ₱2,400, na papasanon kapagkatapos na makumpleto kan mga konsumedores an mga kinakaipuhan na dokumento.
Tanganing maibitaran an kaparehong insidente, pig-eenkaminar kan MNWD an mga konsesyonaryo na magbugtak nin mga meter box tanganing maprotehiran an saindang mga metro nin tubig. Pwede suboot sindang mag-apply sa opisina kan MNWD o maggibo nin sadiring meter box basta magsunod sa standards kan ahensya.
