NAGA CITY- Aminado an pamilya ni Miss Philippines-Universe Rachel Peters na dae ninda malikayan na mamundo sa mga nagruruluwasang bashers kan daraga.
Sa entrevista kan Bombo Radyo Naga ki Mario Obregon, tiyuon ni Peters, sinaysay kaining poon kan manggana sa BB. Pilipinas asin napag-araman na malaban ini sa international competition, kadakol na suboot an nagsusuporta digdi alagad dae man nawawara an mga bashers.
Namumundo man suboot sinda tuyong igwang mababasa o madadangog na mga panraraot sa daraga asin dae na sana ninda ini pinapansin o pigpapatulan.
Sigon ki Obregon, mas bistado ninda si Peters kaya antes pa man ini magrampa sa Miss Universe kan nakaaging Lunes, napagdesisyonan suboot kan bilog na pamilya na manggana o madaog man susuportahan ninda an Bicolana Beuty asin matenir ining Miss Universe sa saindang mga puso.
Kun marurumduman, dae nalikayan na mamundo asin madisganar kan mga taga suporta ni Peters sa resulta kan nasambitang kompetisyon kun saen nakaguno pa ini nin manlaen laeng mga reaksyon.
Enot naman na tinawan doon nin sarong blogger asin pageant enthusiast na dae dapat na ikonektar an pulitika makalihis na dae makalaog sa top 5 sa Miss Universe 2017 si Rachel Peters.
