NAGA CITY- Nilinaw kan Camarines Sur Police Provincial Office na dae totoo an nangyaring abduction sa duwang menor de edad sa banwaan kan Baao, Camarines Sur.
Sa entrevista kan Bombo Radyo Naga ki PCPT Liza Jane Alteza, Public Information Officer of Camarines Sur Police Provincial Office, sa pigkundusir na hararuman na imbestigasyon kan mga kapulisan, napag-araman na dae totoo an pig-istorya kan sarong aki dapit sa kabisto kaini na pig-kidnap kan mga kalalakihan na nakalunad sa puting van.
Basado sa imbestigasyon, an pigsabi na pigdukot an salbadong nasundo kan saindang ama asin nagtitinir sa saindang harong.
Pigtawan duon pa kan opisyal na mayong naireport na missing person sa banwaan kan Baao alagad totoo na igwang puting van na nahiling sa area.
Paliwang ni Alteza an puting van na nahiling an pagsasadiri kan sarong telco company na kan mga oras na nangyari soboot an insidente an nagpapakarhay kan telco tower.
An mga lalaki na nahiling kan aki an mga technician kan nasambitan ng telco company na pinatotoohan man kan mga ini sa paagi kan pagpapahiling kan saindang mga ID.
Sa ngunyan, nagpagirumdom na sana si Alteza na antes na mag-like, share asin mag comment sa sarong post dapit sa kidnapping incident asin iba pang mga sensitibong bareta, enoton na magreport sa mga kapulisan asin pirmeng i-verified kun totoo o dae.
