Gadan an lima katawo, kabali an duwang security guard, matapos magpakawala nin limang missile an mga rebeldeng Houthi sa complex kan palasyo kan presidente sa syudad nin Aden sa sur kan Yemen kan Huwebes.
Ligtas asin mayong lugad an prime minister asin mga miyembro kan gabinete kan Yemen na yaon sa laog kan Maashiq presidential palace kan mangyari an pag-atake, segun ki Information Minister Moammar al-Eryani.
Segun man ki Yahya Saree, tagapagtaram kan militar kan Houthi, an insidente parte kan saindang pormal na polisiya na targeton an mga saudi military build-ups saen man ini manutaran.
Ibinunyag kan sarong news agency na an saindang binomba iyo an headquarters kan military operations kan mga opisyal kan Saudi Arabia kaiba an imbakan nin mga armas sa laog kan complex.
Nadangog kan nagkapirang saksi an makusog na pagsabog sa palibot kan palasyo mantang padagos na binabantayan kan mga awtoridad an seguridad sa bilog na rehiyon matapos an nasabing pag-atake.
