NAGA CITY- Padagos an monitoring kan pamayuhan kan Barangay Balatas sa siyudad nin Naga tanganing malikayan na igwang mga tawo na mag-istar sa irarom kan tulay.
Sigun ki Ferdinand De Hitta, Barangay Kapitan kan Balatas Naga City, padagos soboot an saindang pag-impormar sa mga residente na bawal asin delikado an pag-istar siringman an pagtambay sa irarom kan tulay.
Katakod digde, an mga indibidwal na kasuarin sanang nanutaran na nakaistar digde an tolos man na pinahali kan mga barangay tanod katabang an kapulisan na napag-araman man na bakong taga-balatas.
Alagad igwang saro pang indibidwal na saindang pigtatabangan sa paagi kan pagsurat sa alkalde kan siyudad nin Naga tanganing matawan nin relokasyon.
Dugang pa kan Kapitan, tanganing masierto na mayong makakalusot padagos an saindang monitorin partikular tuyong bangi.
Igwang mga Barangay tanod an nag-iikot sa mga tulay na nasasakupan kan saindang area komo pag-asegurar na nagsusunod an gabos.
Importante soboot kaya na nasusubaybayan asin natatawan pokus ini tanganing dae na mas orog pang maglala an problema.
Sa ngunyan, hagad na sana ni De Hitta an kooperasyon kan saiyang mga nasasakupan para sa mas salbadong komunidad.
