NAGA CITY- Minamawot kan mga corn farmer sa banwaan nin Pili an espisipikong taripa sa mais.
Sa entrevista kan Bombo Radyo Naga ki Jerry Canave, Barangay Kapitan kan Caroyroyan, Pili, Camarines Sur, sinaysay kaini na igwang problema sa tarifa kan mais nin huli ta nadadaog an mga paraoma kan mga negosyante sa pagbakal sa hababang presyo digde.
Segun ki Canave, nangangaipuhan naman nin specific tariff tanganing maenkaminar an mga paraoma sa pagtatanom asin matabangan sa saindang pag-ooma.
Importante na matawan nin magkakanigong pansin an mga agrangay na ini tanganing mas matawan pa nin solusyon para sa ikakarahay kan mga paraoma.
Mientrastanto, dugang pa ni Canave, bastante man an suplay kan mais sa saindang lugar orog na nakakabalad an mga corn farmer nin saindang pig-ani ngunyan na tag-init.
Maski papano dakulang katabang an siring na kamugtakan kan panahon tanganing masierto na igwang bastanteng suplay kan mais sa merkado na dakula man tabang para sa mga paraoma.
Nagseserbeng dugang na kita kaya ini na magagamit man ninda sa saindang pang araw-aldaw na gastuson sa laog kan saindang mga kaharongan.
