NAGA CITY- Mahigot na tutukan kan pamayuhan kan Concepcion Grande Naga City an pagmantinir kan paz y orden ngunyan na maabot na Bagong taon.
Sa entrevista kan Bombo Radyo Naga ki Jerrold Rito, Barangay Kapitan kan nasambitan ng lugar, sinaysay kaini na problema kan saindang lado an rampant na Theft asin robbery orog na ngunyan na igwang kasiributan an mga tawo. Huli kaini, mahigot an ginigibong pagbabantay kan saindang lado katabang an kapulisan asin barangay tanod.
Sigun sa opisyal, igwang nakabantay na mga kapulisan asin barangay tanod sa saindang barangay na iyong nag-aasegurar kan kasalbuhan kan publiko.
Dugang pa ni Rito, enkaso igwang nahiling na naglalakaw-lakaw na indibidwal orog na mga menor de edad sa mga oras na pigpautob na an curfew an tolos na pigraranihan tanganing kaulayon.
Igwa soboot kaya na nagpamalo-malo sana na nagba-bike o nagpapadyak alagad nagsu-survey na kan lugar.
Mientrastanto, huli ta halangkaw an kaso kan Theft asin robbery sa lugar igwa nang pigbabantayan an pamayuhan kan Concepcion Grande na mga indibidwal sa saindang area na pigtutubudan na imbwelto sa siring na mga salang gibuhon.
Siringman, pigsaysay pa kan opisyal na bako lang gikan sa saindang lugar an nagigibo kaini kundi gikan man sa mga pagtaraid na lugar.
Sa ngunyan, pig-enkaminar na sana ni Rito an mga saiyang mga nasasakupan na makipag-kooperar sa sainda tanganing masimbagan an nasambitan ng problema.
