NAGA CITY- Pigtawan duon kan pamayuhan kan Naga City Police Office na dae selective an saindang pinapara na mga lunadan tuyong nagkukundusir nin mga checkpoint.
Sa nagin paghampang sa mga kagawad kan media ni PCol.Erwin Rebellon NCPO City Director, sinaysay kaini na mayong katotoohan an mga nagluluwas na report na an kinakaya-kaya sanang parahon kan mga kapulisan an mga nagmamaneho kan saindang motorsiklo.
Sigun pa sa opisyal, dae sana ma-focus sa mga motorsiklo an checkpoint nin huli ta kadaklan soboot sa mga nadadakupan nin illegal drugs asin mga armas an nakalunad sa mga 4 wheels.
Huli kaini, mayong rason tanganing sulamenteng an mga motorsiklo sana an magin subject sa saindang operasyon.
Dugang pa ni Rebellon, puon pa sa pinakapuon, dae na selective an saindang pagkundusir kan nasambitan ng operasyon nin huli ta mayong lugar sa saindang hanay an deskriminasyon.
Sa ngunyan, preparado man an Naga City Police Office na mag-adjust enkaso igwang pagbabago sa kasuguan kan pambansang pulisya dapit sa pagkundusir nin checkpoint sa mga tinampo.
