Inapod ni Israeli Prime Minister Benjamin Netanyahu na sarong “karumal-dumal na gibo kan antisemitism” an pangbabadil sa duwang empleyado kan embahada kan Israel sa sarong Jewish event sa Washington, D.C.
Inarestar kan pulisya an sarong suspek na soboot nag aapod pa nin pro-Palestinian slogans antes na badilon si Yaron Lischinsky, sarong researcher kan embahada, asin si Sarah Milgrim, sarong administrative assistant.
Ikinabit ni Netanyahu an insidente sa lumalalang tensyon asin man anti-Israel sentiments kasunod kan iriwal sa Gaza, kun saen labi sa 53,000 Palestino an naireport na binawian nin buhay.
Kasabay kaini, nahahampang si Netanyahu sa arrest warrant gikan sa International Criminal Court huli sa soboot war crimes.
Padagos pa man an opensiba kan Israel kontra sa Hamas, sa ibong kan nagkukusog na pressure gikan sa mga nasyon sa Europa, Canada, asin magin sa Estados Unidos na naghahagagad nin tulos na untok-putukan.
Mientrastanto, sinaysay kan Anti-Defamation League na naglangkaw nin haros sampulong beses an mga antisemitic incidents sa U.S. sa nakalihis na dekada—sarong trend na pigbibisto kan kadaklan na Israeli komo patunay kan peligro sa saindang seguridad.
Sigun sa mga analyst, bagaman makamundo an insidente, malabong magkaigwa ini nin tulos na epekto sa panundunan kan Israel sa Gaza, kun saen man an gobyerno ay padagos na naglaladawan sa gyera komo “existential” o laban para sa saindang kasalbaduhan.
