NAGA CITY- Pangapudan kan sarong paraoma sa gobierno na pakarhayon an pagmanehar sa lado kan agrikultura sa nasyon.
Sa entrevista kan Bombo Radyo Naga ki Chistopher Alindar, Former Secretary kan Magsasaka at syentipiko para sa Pag-Unlad ng Agrikultura- Luzon, sinaysay kaini na nawawalat an Pilipinas sa lado kan agrikultura kun ikukumparar sa ibang nasyon siring na sana kan Thailand na kun saen an saindang mga paraoma an marhay an estado sa buhay.
Katakod kaini, importante soboot an pagkakaigwa kan pig-aapod na post harvest facilities sa bilog na nasyon nin huli ta kaipuhan an siring na pasilidad tanganing ma-preserve an mga produkto dawa dae na season kan mga ini.
Sigun pa ki Alindar igwang pondo an gobierno para digde alagad napapasiring soboot sa bulsa kan mga nagkapirang corrupt officials na orog pang nagpapalala sa pagsakit na naeeksperyensiyahan kan mga paraoma.
Dugang pa ni Alindar, komo backbone kan komunidad o sarong nasyon, importante na masimbagan an mga problema na kinakahampang sa lado kan agrikultura tanganing maenkaminar man an mga local farmers na ipadagos an saindang napuonan.
Ini nin huli ta igwang mga paraoma an dae na mawot pang ipadagos an saindang pagtatanom huli sa manlaen-laen na balidong rason.
Sa ibong na lado, dae man uyon si Alindar sa pag-aangkat kan gobierno nin mga agricultural products nin huli ta nakakadugang pa ini sa pagkalugi kan mga paraoma asin kawaran nin pagtangkilik sa mismong gikan sa Pilipinas.
Sa ngunyan, hagad na sana kaini na mas orog pang mahiling kan gobierno an mga problema sa lado kan agrikultura tanganing mapa-angat man an buhay kan mga Pilipinong paraoma.
