Ipigheras ka sarong paratukdong Pilipino na ngunyan nagtutukdo sa Thailand, an saiyang mga pinag-agihan na angat antes ini makapagtrabaho sa ibang nasyon.
Sa intrevista kan Bombo Radyo Naga kay Joash Cariaga (Pe Teacher, Bombo International News Correspondent in Thailand), sinabi kaini na hali sa pagiging kargador sa palengke, parapamitas nin mais, asin paggibo nin iba-ibang raket kan siya nasa kolehiyo pa, nagpakasakit siyang mag-adal tanganing makatapos. Sa edad na 20 anyos, nagdesisyon siyang magtukdo sa Thailand huli sa sadit na sweldo kan mga guro sa Pilipinas asin sa saiyang handong makatabang sa saiyang pamilya
Segun ki Cariaga, dakula an pinagkaiba kan sistema nin edukasyon sa Thailand kumpara sa Pilipinas. Sabi niya, mas nakapokus an mga guro sa aktuwal na pagtukdo ta dikit sana an administratibong trabaho asin mas simple an paggibo nin lesson plan. Dugang pa, nakakatanggap sinda nin mas halangkaw na sweldo, health insurance, asin regular na medical check-up bilang kabali kan saindang mga benepisyo.
Luwas sa edukasyon, hinangaan man ni Cariaga an disiplina asin kultura kan mga Thai. Ipigladawan kaini na an Thailand bilang sarong ligtas asin maayos na nasyon, kun sain bihira nang madangong an pagbusina sa tinampo asin halanglaw an paggalang kan mga tawo sa lambang saro. Dugang pa kaini na an nagkapira sa saindang kaugalian, arog kan paglikay sa pagkapot sa payo kan mga aki komo tanda nin paggalang sa kultura ninda.
Manungod man sa isyu kan West Philippine Sea, sinabi ni Cariaga na importante na maitukdo sa mga aki an saindang mga karapatan asin an kasaysayan kan nasabing teritoryo. Alagad, idinugang kaini na dapat ini itukdo sa paaging nagtataguyod nin katoninongan asin bako nin kadahasan. Para sa saiya, an maogmang komunikasyon asin padagos na pag-asenso kan bansa an susi sa marhay na relasyon sa ibang mga nasyon.
Nanawagan si Cariaga sa gobyerno na mas suportahan pa an sektor nin edukasyon paagi sa pagtaas kan sweldo kan mga guro, pagtao nin sapat na kagamitan sa pagtukdo, pagbabawas kan paperwork, asin pagpapatibay nin mga layi na maprotekta sa kapakanan kan mga guro. Segun sa saiya, an pagpapahalaga sa mga paratukdo importante tanganing mapamarhay an kalidad kan edukasyon asin an kinabukasan kan nasyon.
