NAGA CITY – Pigtawan-duon kan sarong opisyal sa PNP Presentacion, Camarines Sur an importansya kan paggigin first responder kan mga namamanwaan enkaso magbungkaras an anuman na insidente.
Sa entrevista kan Bombo Radyo Naga ki PCPT. Mark Spaña, chief of police kan Presentacion Municipal Police Station, pigsaysay kaini na kan Hulyo 1, nagkundusir an saindang hepatura nin 1st rescue march na pigsponsoran kan MDRRMO asin pigpartisiparan kan mga punong barangay asin mga rescue team kan barangay.
Kun saen, pigtukdoan an mga ini kun pan-o magresponde enkaso magkaigwa nin pagbaha, landslide, aksidente sa tinampo asin iba pang emerhinsya.
Obheto kaini an tanganing magin first responder an mga brgy official o iba pa nin huli ta hararayo an ibang mga lugar sa banwaan na dae tulos kayang marespondehan kan saindang lado asin mga rescue team kan munisipalidad.
Mientrastanto, an kadalasan man soboot nairerehistro an insidente sa banwaan an aksidente sa tinampo.
