Pig-iimbestigaran na kan Philippine Coast Guard (PCG) an posibleng oil spill o paglangkaw kan langis makalihis na madetect an bakas kan langis sa lugar kun saen huring namataan an tumaob na Singaporean-flagged cargo vessel na M/V Devon Bay.
Sigun sa PCG spokesperson Captain Noemie Cayabyab, nahiling an bakas kan langis sa pigsagibong aerial search sa naireport na distress site na pigkakarkulong nasa 141 nautical miles kanluran kan Sabangan Point sa Agno Bay sa probisiyan kan Pangasinan.
Naobserbahan man kan mga awtoridad an sarong naglubog na life raft, na sarong sadit na inflatable boat na piggamit para sa emergency evacuation.
Mantang dae mahewas an oil sheen na nahiling sa lugar, masusing pigsuri ini kan PCG.
Piglinaw man kan PCG official na presenteng pa nindang pigberipika an report dapit sa duwang Pilipino tripulante na binawian nin buhay gikan sa insidente.
Nakikipag-tabangan na man an PCG sa Hong Kong Maritime Rescue Coordination Centre para sa pagturn-over kan mga nasagip na tripulante.
Marurumduman, naenot ng naireport na naglalayag kaidto an cargo vessel na igwang kargang iron ore gikan Zamboanga del Sur pasiring, Yangjiang, China kan mangyari an insidente.
Sigun ki Cayabyab, saro sa concern ngunyan sa tahaw kan nagpapadagos na paghahanap sa mga nawawarang Pilipinong tripulante an lagay kan panahon kawsa kan amihan asin presenteng nakataas na gale warning sa lugar.
Sa ibong kaini, nagpadara pa man an PCG nin assets kaini para sa search and rescue operations sa ibong kan masungit na lagay kan panahon sa dagat.
Nagpasalamat man an PCG official sa China Coast Guard sa pagsalbar sa mga Pilipinong tripulante.
