Pinahimutikan kan Philippine Navy kan nakalihis na Huwebes na nasa saindang kustodiya si retired Marine Sgt. Orly Regala Guteza, an dating sundalong nagin witness sa Senate Blue Ribbon Committee investigation katakod kan soboot maanumalyang flood control project kan gobyerno.
Sigun ki Navy spokesperson Capt. Marissa Martinez, haloy nang retirado si Guteza gikan sa Philippine Marine Corps magpuon pa kan nakalihis na Hunyo 30, 2020, huli digde, mayo na soboot ining koneksyon sa Philippine Navy.
Ginibo kan nasambitan ng opisyal an pahayag makalihis sabihon ni dating Quezon City Rep. Mike Defensor na si Guteza an soboot nasa irarom kan proteksyon kan Philippine Marines.
Marurumduman na si Guteza an nagin laog kan mga bareta makalihis kaining isiwalat sa pagdangog sa Senado na nagdara soboot ini nin male-maletang bag nin kwarta sa mismong harong ni dating House Speaker Martin Romualdez asin dae nag haloy nagsayuma na tawan nin proteksyon kan Senado, asin pighurot na kaya kaining protehiran an saiyang sadiri.
Siringman, naglataw an mga pagdududa sa saiyang kredibilidad kan pinahimutikan kan sarong abogado na tinintaan kaini an affidavit na binasa ni Guteza sa Senado huli digde, dae na soboot makontak an dating sundalo.
Katakod pa kaini, sinaysay pa ni Capt. Martinez na nagtitinir na propesyonal asin non-partisan an Philippine Navy, na nakatuon soboot sa pagtupad sa tungkulin asin man pagsisirbi sa nasyon nin igwang dangal asin integridad.
