Sarong phreatic eruption an naobserbaran sa Bulkang Taal sa laog kan nakalihis na 24 oras.
Segun sa Philippine Institute of Volcanology and Seismology (PHIVOLCS), naghaloy nin 7 minutos asin 39 segundos an phreatic eruption sa nasambitan ng bulkan.
Mayo man naikurit na volcanic earthquakes, alagad naobserbaran an mahibog na plumes na may langkaw na 1,800 metros gikan sa bulkan na napadpad sa direksyon kan Sur-sulnupan.
An bulkan nagbuga nin average na 1,577 tonelada nin sulfur dioxide kan Oktubre 16. Nagkaigwa man nin upwelling kan mainit na volcanic fluids sa Main Crater Lakes.
Huli kaini, nagtetinir sa Alert Level 1 o low level unrest an Bulkang Taal.
Pigpapagirumduman man sa publiko na bawal an paglaog sa Taal Volcano Island na pigkokonsiderar na permanenteng danger zone, orog na sa Main Crater asin Daang Kastila fissures, siring man bawal an pagpalayog nin behikulong panghimpapawid sa tuktok kan bulkan.
