Nakapagrehistro an Pilipinas nin pinakamaluya na inflation rate o paglangkaw sa pangkagabusang antas kan presyo kan mga kalakal asin man serbisyo sa nasyon kan nakalihis na bulan nin Mayo makalihis an haros anom na taon o magpuon kan Nobyembre 2019.
Sa sarong pulong balitaan kan nakalihis na Huwebes, Hunyo 5, pigreport ni Philippine Statistics Authority (PSA) Undersecretary asin National Statistician Dennis Mapa naghupa an inflation sa nakalihis na bulan sa 1.3%.
Ini an mas maluya gikan sa 1.4% na nairehistro kan Abril kan presenteng taon, asin sa 3.9% kan nakalihis na Mayo 2024.
Nagdara man ini sa average inflation sa primerong limang bulan kan 2025 sa 1.9%.
Paliwanag kan PSA chief na an mas maluya na inflation an dara kan mas maluya man na paglangkaw nin mga kantidad kan paharong, tubig, elektrisidad asin man iba pang presyo nin langis na nagluya sa 2.3%.
Nakaambag man sa pagbaba kan inflation iyo an mas maluya na paglangkaw kan kantidad kan mga serbisyo sa restaurant asin accommodation na nasa 2% kan bulan nin Mayo.
Pag-abot man sa food inflation, nagtitinir ining nasa 0.7% kan Mayo, dakula man an ibinaba kaini gikan sa 6.1% na nairehistro kan Mayo kan nakalihis na taon.
Mientrastanto, sigun sa PSA, laog pa man an inflation rate kan Mayo sa pagkarkulo kan Bangko Sentral ng Pilipinas (BSP) gikan sa 0.9% hasta sa 1.7%. Target man kan economic managers kan Marcos administration na mamantinir an inflation sa 2% hasta 4% ngunyan na taon.
