Aram baya nindo mga ka-bombo, binawian na nin buhay an pigmirar komo pinakagurang na tawo sa bilog na kinaban.
Si John Tinniswood, sarong Englishman na ipinangaki sa kaparehas na taon kan maglubog an Titanic asin nakasalbar sa duwang giyerang pankinaban asin duwang pankinaban man na pandemya an nagadan sa edad na 112-anyos kan nakalihis na Lunes, pirang bulan antes na bistuhon ini komo pinakagurang na tawo sa bilog na kinaban kan Guinness World Records.
Binawian nin buhay si Tinniswood sa sarong care home sa Southport, norteng-sulnupan kan England, na napapalibutan kan musika asin pagpapadangat.
Ipinangaki kan Agosto 1912 sa Liverpool, nabisto kaini an agom na si Blodwen sa sarong baylehan asin nagpakasal kan 1942, sa kasagsagan kan World War II kan magserbe ini sa Royal Army Pay Corps, na responsable para sa pananalapi asin mga suplay kan pagkakan.
Kan igawad sa saiya kan Guinness World Records an titulong pinakagurang na tawo sa kinaban kan Abril ngunyan na taon, pigsaysay ni Tinniswood na mayong dakulang sikreto sa saiyang halawig na buhay.
