NAGA CITY- Naglalaom an mismong regional director kan Police Regional Office (PRO) 5 na dae totoo an relasyon ni P/Supt. Maria Christina Nobleza sa sarong miyembro kan bandidong Abu Sayyaf.
Sa entrevista kan Bombo Radyo Naga ki PC/Supt. Melvin Buenafe, director kan PNP Bicol, sinaysay kaini na sa ibong kan nagruruluwasang mga bareta manungod sa relasyon suboot ni Nobleza ki Renierlo Dongon, miyembro kan nasambitang bandidong grupo, padagos pa nanggad na naglalaom an opisyal na dae ini totoo.
Sigon ki Buenafe, nakaibanan niya si Nobleza kan junior officer pa sana ini asin naka-assign sa PNP Camarines Sur Crime Laboratory.
Aminado an regional director na sarong matibay na pulis si Nobleza urog na pag-abot sa saiyang trabaho alagad sinaysay man ni Buenafe na posibleng nagbago suboot an bicolanang police colonel sa pag-agi kan panahon.
Pigsierto man ni Buenafe na maagi sa due process o pantay na imbestigasyon an kinakahampang na kontroberisya ngonyan ni Nobleza.
Napag-araman na nakaibanan ni Buenafe an nasambitang police colonel kan iniimbestigaran pa ninda an Manhon murder case sa barangay Concepcion Grande sa ciudad nin Naga.
