Pigsierto kan Philippine National Police (PNP) na matinir na vigilant asin proactive sa paglaban sa online scams, orog na sa panayon kan Pasko.
Sigun ki Acting PNP Chief Lt. Gen. Jose Melencio Nartatez Jr., gabos kan pulis an inalerto tanganing protehiran an publiko asin tulos na panimbagon an mga naggigibo kan online scams.
Basado sa PNP Anti-Cybercrime Group (ACG), igwang 3, 941 na mga kasong online scams an naikurit sa 2025, kumparar sa 7,081 kaso kan taong-2024.
Alagad maski mas hababa an numerong naikurit ngunyan na taon, pigtawan-duon ni Nartatez na an misyon kan PNP an protehiran an publiko asin siertuhon na napapanimbag an mga perpetrator.
Inabisuhan man kan PNP Chief am publiko na magin malikay sa online transactions asin dae basta-basta magtubod sa nahihiling sa internet.
