Inalerto na kan Philippine National Police (PNP) an saindang mga personnel sa Maritime Group asin Aviation Security Group para sa posibleng pagdulag ni Senador Ronald dela Rosa paluwas kan Pilipinas.
Kinukonsiderar kan Department of Justice si dela Rosa bilang pugante asin ipinagsugo an pagdakop digdi sa bisa kan arrest warrant hale sa International Criminal Court (ICC). Ginibo an direktiba matapos ibasura kan Korte Suprema an kahagadan kan senador para sa pagpaluwas nin temporary restraining order (TRO) kontra sa nasabing warrant.
Sa sarong statement kan Huwebes, Mayo 21, sinabi ni PNP chief na si Jose Melencio Nartatez Jr. na inalerto na ninda an police forces tanganing mas paigtingon an intelligence monitoring sa gabos na exit points, kabali na an southern backdoor.
Sa ngunyan, kinukonsiderar kan ICC bilang wanted si dela Rosa sa kasong Crimes Against humanity na may kinaaraman sa War on Drugs ni dating Presidente Rodrigo Duterte.
Mientrastanto, inatasan an Philippine National Police (PNP) asin National Bureau of Investigation (NBI) na dakopon si Senador Ronald “Bato” dela Rosa.Sa sarong press briefing, kinumpirma ni Frederick Vida na “fugitive from justice” na si Senador Bato asin dapat nang darahon sa International Criminal Court (ICC) tanganing atubangon an mga kasong nakasampa laban saiya.
Sigun sa DOJ official, ini an pagsunod sa inisyung arrest warrant kan ICC na may bisa o “valid.”
Magigirumduman na enot ng pinangaranan si Dela Rosa bilang saro sa mga co-perpetrators sa kasong Crimes Against Humanity na may koneksyon sa suboot ribo-ribong panggagadan sa irarom kan kampanya kontra iligal na droga kan Duterte administration.
