Pigkumpirmar kan Philippine National Police (PNP) ngunyan na aldaw, Enero 31, 2025 na sarong Police Official an kabali sa mga binawian nin buhay sa nangyaring salpukan kan American Airlines flight sa sarong US Army Black Hawk helicopter sa Washington D.C. sa Estados Unidos.
Sa pulong balitaan sa Camp Crame, binisto ini ni PNP PIO Chief PCol. Randulf Tuaño na si Police Col. Pergentino Malabed Jr., hepe kan PNP Supply Management Division. Sigun ki Tuaño, nasa official travel si Malabed kan nangyare an insidente. Igwa soboot ini nin kaibanan na sarong PNCO asin sarong NUP asin may foreign travel authority tanganing magpasiring sa India para sa inspection kan 2,675 na vests na babakalon kan PNP.
Nakaabot ini sa India kan Enero 22 gikan sa Manila. Sigun pa ki Tuaño, napag-araman ninda sa foreign liaison division na sa nasambitan ng numero kan vests, nakapag-test nin anom sinda Malabed, pigwalat an saro sa India asin an lima an dadarahon sa shop kna kumpanya sa USA kun saen gigibuhon man an final testing kan babakalong vests kan PNP.
Gikan sa Kansas USA, nagbyahe soboot si Col. Malabed tanganing mag courtesy call ki Police Attache Col. Moises Villaceran Jr. sa Washington D.C.
Nagpepreparar na kuta para sa landing an American Airlines 5342 sa airport kan mangyari an pagkabudalan kan duwang behikulo. Nakumpirmang kabali si Malabed sa mga nagadan basado sa mga narekober na mga dokumento siring na sana kan flight manifest asin passport.
Sa ngunyan, pigtatabangan na man soboot kan PNP na agom kan nagadan na pulis pasiring nin Estados Unidos tanganing personal na makumpirmar an pagkakabistohan kaini. Sigun ki Tuaño,labi an pakikidamay kan pambansang pulisya asin nagpromesa man an PNP nin tabang asin suporta para sa nawalat na pamilya.
