Normal pa man an sitwasyon sa Lake Buhi sa ibong kan krisis sa produktong petrolyo.
Sa intrevista kan Bombo Radyo Naga ki Jovenson Narrra (Lake Development Designate, Buhi, Camarines Sur), sinabi an kondisyon kan lawa kun sain may mga oras na maalon asin may pagkakataon man na malinaw an tubig, na nakakatabang sa pagmintinar kan tamang oxygen level para sa mga isda. Pigkumpirma man kan opisyal na mayo pa man na naitatalang fish kill sa lugar, alagad posible ini mangyari kun magpadagos an matinding init asin maging banayad an tubig sa lawa.
Mientrastanto, nagtaas liwat an presyo nin tilapia sa nagdangog na mga aldaw. Hali sa P140 kada kilo, nagsaka ini sagkod P155–P158 sa lebel nin broker asin posibleng umabot sa P160 sagkod P165 sa merkado, bangod sa pagdakul nin demand sa panahon kan Semana Santa. Segun pa kay Narrra, dae man lubos na naapektuhan an mga parasisira sa pagtaas nin presyo nin krudo ta nakakabawi man sinda sa pagtaas kan presyo nin sira.
Sa lado kan konserbasyon, padagos an pag-aalala sa nagkakaubos na populasyon nin sinarapan o an Mistichthys luzonensis na endemik sa lugar. Segun sa mga pag-adal, nagkakaigwa na ini nin pagkaubos sa lawa, kaya igwa nin mga hakbang arog kan pagtatatag nin sanctuary asin pagpapatuman nin mga regulasyon sa pangisdaan.
Dakul man sa mga kinakahampang na isyu an overstocking nin tilapia sa mga fish cage na posibleng nakaapekto sa natural na balanse kan ecosystem. Komo tugon, nagpapadagos an lokal na gobyerno nin mga intervention arog kan fuel subsidy, pagtao nin fingerlings, asin ayuda sa mga bangkero asin transport operators sa mga lakeside barangay.
Nangapudan man an opisyal sa publiko na mantiniron an patas asin balanse na pagpresyo tanganing dae magin pagabat sa mga konsumidor asin sa sektor nin parasisira.
