Nagtutubod an House Prosecution Panel nagtitinir na igwa nin karapatan asin kapangyarihan an Senate Impeachment Court na desisyunan an isyu kan 2/3-vote threshold mantang nagpapadagos an impeachment trial kontra ki VP Sara Duterte.
Idinugang ni Rep. Chel Diokno na bakong an two-thirds requirement an kinukwestyon kan prosecution, kundi an denominator kun sain ibabase an two-thirds para sa conviction.
Binalikan ni Diokno an pananaw kan apat na Amici Curiae na saiyang sinabi na dai nagsasabi na an 16 votes sarong absolute o dai nagbabagong numero.
Iminungkahi niya na dapat hilingon an usapin sa lente kan accountability, huli an mga senador nagsisirbing impeachment judges na kaipuhan na masusing dinadanggog asin sinusuri an ebidensya bago magboto.
Ipinahiling man kan senador an posibleng magin problema kun ibabali sa denominator an mga senador na dai nakapanumpa bilang impeachment judges o dai nakikikabtang sa proceedings, o legal na dai makakaganap kan saindang papel o tungkulin bilang judges.
Sa ibong na lado, nagpirming nagtutubod an defense team ni VP Sara Duterte na dapat pa man giraray na ibali sa threshold an mga senator-judge na absent o dai nakakakabtang sa impeachment proceedings.
Sa presentasyon ni Atty. Michael Poa, idinugang niya na igwa nin record an korte sa gabos na nangyayari sa proceedings na pwedeng balikan o repasuhon kan Senator-Judge na absent.
Kun sa paghiling niya kan mga absent na judge, dai sinda makakapagtao nin ‘fair’ vote, pwede man sindang mag-abstain o dai na makikabtang.
Segun ki Poa, dai kaipuhan na ibaba an voting threshold asin sa halip, dapat pa man giraray na sundon an itinatao kan ley na 2/3 kan 24 na senador kan nasyon o 16 votes para sa conviction.
An mayorya kan mga senator-judge an nagboto pabor sa mosyon ni Senator Erwin Tulfo na talakayon asin pagbotohan an posibilidad kan pagbabago sa denominator para sa 2/3-vote threshold na magsisirbing basehan sa conviction o acquital ni VP Sara Duterte.
Kaiba sa mga dai ibibilang iyo an mga naka-detain, an mga senador na dai maaraman kun sain, asin idtong mga senador na mayong kakayahan na makikabtang sa impeachment trial huli sa medikal na kundisyon.
