NAGA CITY-Padagos an pag-enkaminar kan PSA-Camarines Sur sa publiko na magparehistro kan saindang mga sadiri o kan saindang mga kaakian.
Sa entrevista kan Bombo Radyo Naga ki Raul Aspe, Chief Statistical Specialist kan PSA Camarines Sur, sinaysay kaini na kasabay kan pagselebrar kan Civil Registration Month ngunyan na bulan kan Pebrero igwa man soboot nakalinyadang mga programa asin aktibidad an PSA katabang an mga local registrar sa bilog na nasyon tanganing ma-enkaminar an publiko na magparehistro.
Saro soboot digde an mobile registration kun saen nagpapasiring an mga personahe kan PSA sa mga hararayong lugar tanganing ma-enkaminar an mga residentes na iparehistro an birth certificate kan saindang mga aki siringman kan iba pang indibidwal na mayo pang record.
Sigun ki Aspe kabali pa sa saindang mga programa an paggibong libre sa registration asin pagkua kan mga requirements sa parte kan PSA siringman sa lado kan mga LGU’s.
Obheto kaini na mabawasan an mga isipon kan mga tawo sa pagpaparehistro.
Saro kaya sa mga rason kun tano dae nakakapagparehistro an ibang tawo huli sa pangangaipuhan sa kwarta asin dae soboot aware an mga ini na kaipuhan palan an siring na dokumentos.
Pigtawan duon kan opisyal na importante an pagkakabistuhan o birth certificate kan sarong tawo orog na sa mga benipisyo na saindang pwedeng mareseber.
Huli kaini, pig-abisuhan ni Aspe an publiko na sa laog kan 30 hasta 90 days puon kan pagpangaki dapat makapagparehistro na an mga magurang tanganing dae soboot magkaproblema.
Enkaso kaya na late registration na, mas kadakol na requirements an pighahagad na dugang pa sa isipon kan sarong indibidwal.
Sa ngunyan, target kan PSA-Camarines Sur na makapagrehistro nin nasa 33,000 para sa taong 2025 asin sa presente ngunyan na bulan kan Pebrero an igwa nang 20%.
