NAGA CITY- Kinumpirmar ngunian kan Southern Luzon Command (Solcom) na anom katao an dinukot kan pigtutubudang mga miembro kan New People’s Army sa Barangay Sitio Tumabaga, Nasalaan, San Francisco, Quezon.
Sa entrevista kan Bombo Radyo Naga ki Col. Teody Toribio, tagapagtaram kan Solcom, sinaysay kaini na pasado alas 5 kasuodmang hapon kan sapiritang nilaog kan kinakarkulong maabot sa 50 armadong kalalakihan an rancho na pagsasadiri ni James Murray.
Sigon ki Toribio, kinua kan nasambitan ng grupo an nagkakapirang importanteng mga kagamitan sa laog mantang niraot man kan mga ini an nagkakapira pang mga gamit.
Dai pa nakuntento, enot nang hinostage kan mga salarin an anom na trabahador antes dagos na nilalay pparayo sa nasambitan ng lugar.
Dugang pa ni Toribio, padagos man nindang inaaram kun totoo an nakaabot sa saindang impormasyon na duwa sa anom na biktima an miembro kan Cafgu.
Katakod kaini, padagos suboot an ginigibong operasyon kan kasuldadusan para masiyerto an seguridad kan mga tao sa lugar mantang kinukumpirmar man suboot an nakaabot sa saindang impormasyon na pinalibre na kan nasambitan ng gurpo an mga biktima.
