Sa ibong kan mayong untok na black propaganda, an paglalapigot asin matapat na pamamahala ni Presidente Ferdinand R. Marcos Jr. an nagbunga makalihis magsirit an satisfaction ratings kan saiyang administrasyon nin double digits sa pinakahuring survey ng Social Weather Stations (SWS).
Nagpahayag nin kumpiyansa si National Unity Party (NUP) President asin Camarines Sur 2nd District Rep. Luis Raymund “LRay” Villafuerte na ini an bunga kan “hard work, high road asin honest governance” kan Presidente.
Sigun sa SWS, an paglangkaw kan satisfaction ratings kan presidente an huli sa paglalapigot kan saiyang administrasyon na tabangan an mga biktima kan mga kalamidad, pamarhayon an kalidad kan edukasyon kan mga aki asin tabangan an less fortunate individual.
Binatikos man kan NUP president an pig-aapod kaining “mayong untok na black propaganda” kontra sa presedente mantang pigdespensarar kaini an agenda kan administrasyon na iangat an kabuhayan kan mga Pilipino.
Naglataw sa SWS survey puon Hunyo 23 hasta Hulyo 1 na 62% kan mga Pinoy an naoogma sa administrasyon ni Presidente Marcos, 22% an dae naoogma asin 15% ang undecided. An satisfaction ratings ni Presidente Marcos an naglangkaw nin double digits sa “good” (+40) huli sa paghusay sa government services, kun saen, naglangkaw gikan “moderate” kan Marso.
