NAGA CITY – Pagpepenitensya para sa pamilya asin marhay na salud an rason kun tanu inabot na nin 35-taon an pagpapasan nin krus kan sarong deboto ni Amang Hinulid toyong Biernes Santo sa Calabanga, Camarines Sur.
Sa entrevista kan Bombo Radyo Naga ki Jose Alvarado, sinaysay kaini na aki pa sana ini kan maeksperyensyahan na kaini an pagmimilagro kan imahe makalihis na magkaigwa ini nin malalang helang.
Nagkapirang beses naman kaining naeksperyensyahan an kaparehas na kaganapan na mas orog na nagpapusog sa saiyang pagtubod ki Amang Hinulid.
Komo pagpapasalamat sa pagsimbag sa saiyang mga pangadyi asin pagbasol sa saiyang mga nagibong kasalanan, nagin panata na ni Alvarado na magpasan nin krus toyong Semana Santa, kun sain ini mismo an naggigibo kan krus na saiyang pigpapasan.
Sa ngunyan, pangapudan na sana ni Alvarado sa gabos na itagama an panahon na ini tanganing pagnilayan an mga nagibong kasalanan sa Kagurangnan asin mahagad nin tawad, magpasalamat sa gabos na mga biyaya na padagos na nareresibe kan lambang saro.
