Pigpahayag kan TRABAHO Partylist an suport kaini sa paglangkaw kan sahod kasuarin sana na pig-aprobaran kan 14 na Regional Tripartite Wage and Productivity Boards (RTWPBs), na pakikinabangan kan haros limang milyong minimum wage earners sa bilog na nasyon.
Sigun ki Atty. Mitchell-David L. Espiritu, tagapagtaram kan TRABAHO Partylist, an mga paglangkaw kan sahod an sarong importanteng lakdang tanganing mapagian an pasanon kan mga obrerong Pinoy.
An mga bagong pagpapakarhay kan sweldo, na mapuon sa 2025 an parte kan serye kan mga desisyon kan mga regional wage boards tanganing masimbagan an naglalangkaw na kantidad kan barakalon asin an mga ekonomikang huma na naeekspreyensiyahan kan mga minimum wage earners.
Pig-enkaminar man kan partylist an mga lider kan gobyerno asin pribadong sektor na siertuhon na marhay an implementasyon kaini asin susunodon kan mga negosyo an mga bagong pamantayan kan sahod.
Nangapudan man ini sa gobyerno na magpadagos sa pagsuporta sa mga programang makakatabang sa pagpapalangka kan kakayanan kan mga obrero asin sa pagpapamarhay kan saindang employability sa marekas na nagbabagong ekonomiya.
Mantang padagos a pigkakahampang kan nasyon an mga huma sa ekonomiya, an desisyon kan mga RTWPBs na ipautob an mga paglangkaw kan sahod an sarong senyales na liwat pagtataong importansiya sa mga karapatan kan mga obrero.
