Naga City-Nagtutubod an research company na BMI Country Risk & Industry Research na mas matatawanan nin benepisyo an Vietnam kan Executive Order 62 ni Presidente Bongbong Marcos.
Marurumdumang an nasambitang EO an nagbabawas sa taripa kan imported na bagas sa Pilipinas na piglalaomang magigin epektibo sa Hulyo 6.
Sigun sa research group, siertong orog pang malangkaw an palaog nin volume kan bagas sa Pilipinas pag dagusan nang nagin epektibo ini asin magamit na kan mga rice export companies gikan sa ibang mga nasyon.
Kun hihilingun soboot sa presenteng datos, mas makikinabang igdi an Vietnam na pinakadakulang exporter nin bagas sa Pilipinas.
Nagtutubod an grupo na an paglaog asin pagpapautob sa EO 62 ni Presidente Bongbong Marcos maresulta sa paglangkaw kan presyo kan bagas sa international market huli ta siertong malangkaw an demand kan bagas sa Vietnam asin iba pang mga rice-exporting countries.
An nasambitang demand posibleng mag-gikan man sa ibang mga nasyon na nag-aangkat man nin bagas.
Maski nagtutubod an grupo na mapapababa kaini an presyuhan kan bagas sa Pilipinas, posibleng dai masyado asin dai tulos na mamatean an epekto kaini.
