NAGA CITY- Pigpauntok na ngunyan kan mga personahe kan Naga City Police Office an Search and Retrieval operations sa mga nairehistrong nawawara pa huli sa panlalamasa kan bagyong Kristine.
Sa nagin paghampang sa mga kagawad kan media ni PLtCol. Chester Pomar, tagapagtaram kan NCPO, sinaysay kaini na ipinag-sugo na ni NCPO City Director Police Col. Erwin Rebellon na ipauntok na an paghahanap sa missing na si Cassie huli ta pinagtutubudan na natalbungan na ini nin dakulang parte kan daga sa parte kan Barangay Cararayan.
Siringman, pigsaysay man kan opisyal na kaipuhan ng ilubong an lawas kan sarong lalaki na nadukayang mayo ng buhay sa sarong shuttle bus nin huli ta igwa na soboot ining mabatang parong.
Katakod digde, enkaso, igwang magrani na mag-claim sa lawas kan nasambitan ng lalaki, posible man soboot na hukayon ini enkaso dagusan ng nalubong. Huli kaini, nagsakat na sa kabilugang 16 na indibidwal an binawian nin buhay huli sa bagyong Kristine. 15 digde an binawian nin buhay huli sa pagkalamos asin pagkakuryente mantang an saro an inatake sa puso.
Sa ngunyan, pigsierto man ni Pomar na dagos-dagos an saindang pakikagtabangan sa LGU-Naga sa nagpapadagos man na pagkundusir kan clearing ops.
