SA ibong kan naglalakop na haka-haka na pwedeng magin running mate ni Vice President Sara Duterte sa 2028 Presidential elections, pighurot ni Senator Rodante Marcoleta na dae kaini ini pig-iisip sa presente.
Sa saiyang programa kan nakalihis na weekend, sinaysay ni Marcole na mas nakatuon ini sa saiyang pig-aapod na personal na “quest for correction.”
Ipinahayag man kaini na igwang mga “sala” gikan sa Senado asin dating mga justices kan Korte Suprema na presente kaining pigtatama, kaibahan sinda Justice Carpio, Sen. Ping, Tarriela, Batongbacal, asin parte kan sinasabi ni Sen. Tol.
Sigun sa senador, kadakol na an kaipuhang pakarhayon kaya abala ini sa presente. Dae man ini nagtao nin detalye dapit sa mga sierto na “sala” sa saiyang pigtutukoy.
An pahayag ni Marcoleta an nagluwas pirang aldaw makalihis na ihayag ni VP Sara kan nakalihis na Pebrero 18 an saiyang planong pagdalagan komo Presidente sa 2028, na sarong amay na deklarasyon para sa maabot na eleksiyon.
