Pig-enkaminar ni Senador Juan Miguel Zubiri an Senado na pahewason an imbestigasyon sa mga soboot “ghost” asin maanomalyang proyekto kan gobyerno, bako sana sa flood control.
Sigun ki Zubiri, kaibahan sa dapat busision an rock netting, dredging, cat’s eye, solar lamps, multi-purpose buildings, asin road projects na haloy nang pinagdududahan an kalidad asin implementasyon.
Binanggit kaini an insidente kasuarin sana sa Albay kun saen nagbagsak an atop kan sarong stage na bagong gibo pa sana asin tinamaan san kan uran.
Para ki Zubiri, malinaw na senyales ini kan substandard na pagpapautob kan nagkapirang proyekto na pinondohan kan gobyerno.
Pigtawan-duon kan lehislador na dapat masunadan nin magagabat na kaso, kaibahan an plunder graft and corruption, syndicated estafa, asin falsification of public documents, an mga opisyal asin kontratistang imbwelto.
Non-bailable soboot an mga kasong ini tanganing masierto na dae sinda makakalikay sa paninimbagan.
Dugang pa kaini, posibleng mas dakula pa an kantidad na napasiring sa mga bulsa kan mga tiwaling opisyal asin kontratista kaysa sa mga naenot na kaso kan pork barrel scam.
Sinabi man ni Zubiri na nakaulay na kaini si Senador Panfilo Lacson, na nagtugot asin pigsuhestiyon na sunadan nin mga “predicate crimes” na igwang padusang reclusion perpetua an mga imbwelto tanganing masierto an kaukulang kapadusahan.
