Mas lalong nagkusog an bagyong ‘Julian’ na yaon sa kategoryang severe tropical storm sigun sa state weather bureau PAGASA.
Huring nahiling si Julian sa distansyang 305 km. sirangan kan Aparri, Cagayan na may kusog na duros na 95 kph asin pagbugso na maabot sa 115 kph, sigun sa tropical cyclone bulletin kan Philippine Atmospheric, Geophysical and Astronomical Services Administration (PAGASA) na pinaluwas alas 5 nin aga.
Si ‘Julian’ naghihiro pasulnupan-norte-sulnupan sa rikas na 10 kph.
An Tropical Cyclone Wind Signal (TCWS) No. 2 an nakabandera na sa norte-sirangan na parte kan Mainland Cagayan (Santa Ana) asin sa sirangan na parte kan Isla nin Babuyan (Camiguin asin Isla nin Babuyan).
Mientrastanto, an Batanes, an iba pang parte kan Cagayan, an iba pang Isla nin Babuyan, Isabela, Apayao, Abra, Kalinga, an mga parteng sirangan asin sentral kan Probinsya Bukid (Natonin, Paracelis, Sadanga, Barlig, asin Bontoc), an sirangan na parte kan Ifugao (Aguinaldo, Alfonso Lista, asin Mayoyao), Ilocos Norte, an norteng parte kan Ilocos Sur (Sinait, Cabugao, San Juan, Magsingal, Santo Domingo, Bantay, San Ildefonso, asin San Vicente), asin an norteng parte kan Aurora ( Dilasag, Casiguran) an ipinairarom sa TCWS No. 1.
An state weather bureau nagpatanid na an pinakahalangkaw na tropical cyclone wind signal huli sa ‘Julian’ posibleng makaabot sa Signal No. 4.
Si Julian padagos na nagkusog asin maabot pa ining bagyo sa Domingong banggi o amay na aga sa Lunes.
Dugang pa kan PAGASA na igwa nin ‘halangkaw na posibilidad na marikas na magkusog, asin an posibilidad na makaabot sa kategorya nin super typhoon kun sain ini dae man pighahale sa bagyong ‘Julian’.
