NAGA CITY- Nakaamba na mag-umento ngunyan na bulan nin Hunyo an singil sa kuryente kan Camarines Sur II Electric Cooperative (CASURECO II).
Sa entrevista kan Bombo Radyo Naga ki Rinner Bucay, tagapagtaram kan CASURECO II, para sa power raise soboot ngunyan nin Hunyo 2024, sainda soboot na ipapaluwas an aktwal na computation sa maabot nin Hunyo 18.
Dugang pa kaini, sa inisyal nindang evaluation, basado sa information gikan sa saindang core plan department, talagang malangkaw an taripa sa kuryente ngunyan na Hunyo.
Ini huli sa epekto kan paglangkaw nin presyo sa wholesale electricity spot market asin man epekto kan mga pigdeklarar na yellow asin red alert na hasta sa presente namamatean pa an epekto.
Dugang pa kaini an mga nasambitan ng alerto an huli sa kakulangan sa reserbang kuryente. Sa presente sigun ki Bucay mayo pang maitataong pigura an CASURECO II alagad sainda soboot na piglalaoman na dara-dakula an ilalangkaw ngunyan na bulan.
Sainda man soboot na pighihiling na magigin dakula an bayadan huli ta halangkaw man an nagigin konsumo nin kuryente bako sana ngunyan na bulan kundi kan nakalihis man na Abril asin Mayo.
Dugang pa kaini bako sanang power rates an naglalangkaw kundi magin man an kilowatt-hour consumption na haros sigun sa opisyal nagdodoble asin triple. Sigun pa ki Bucay an nangyayari ngunyan bako sana an rates an naglalangkaw kundi magin man an nakokonsumong kuryente huli sa labing init kan panahon.
