Nagsagibo nin follow-up investigation an mga personnel kan Goa Municipal Police Station katakod sa pagkakadiskubre kan kalat-kalat na skeletal remains o mga buto nin tawo sa sarong madoot na parte kan sarong uma sa Zone 5, Barangay Taytay, Goa, Camarines Sur, pasado alas-6 nin banggi kasuudma aldaw nin Martes Setyembre 1, 2026.
An mga labi nadukayan kan tolong indibidwal mantang sinda nagdadakop sira sa sarong salog na harani sa boundary kan Barangay Amoguis, Lagonoy, asin Barangay Taytay, Goa.
Makalihis maresibe kan pulisya an report, tulos na nagduman sa lugar an mga personahes kan Goa MPS tanganing magsagibo nin inisyal na imbestigasyon, dokumentasyon, asin pagproseso sa mga nadukayan na skeletal remains.
Sigon sa imbestigasyon kan mga otoridad, positibong nabisto an mga itinutukdong skeletal remains na ki “Alyas Purita,” 75 anyos, residente kan Barangay Gimaga, Goa, Camarines Sur, na nai-report na nawawara poon pa kan Hulyo 2026.
Sigun sa mga kaparientes kaini, may minamati ining helang asin dati nang nai-report na nag-hali sa saindang harong asin nagduman sa mga harong kan saiyang mga kapamilya.
Huli digdi, nakipagkoordinar an Goa MPS sa SOCO para sa kinakaipuhan na skeletal analysis asin iba pang forensic examination tanganing mas mapagtibay an pagkakabistuhan kan bangkay asin makatabang sa pag-aram kan mga pangyayari na may koneksyon sa insidente.
Padagos man an follow-up investigation kan Goa MPS tanganing malinawan an bilog na pangyayari na may koneksyon sa pagkawara kan biktima.
