Inapod ni Atty. Israelito Torreon komo ‘pawang mga marites’ an soboot arrest warrant kontra ki kay Sen. Ronald ‘Bato’ Dela Rosa na ibinunyag ni dating Presidential Spokesperson Harry Roque.
Kasuodma kan sinaysay kan dating sekretaryo na nagluwas na an arrest order kontra ki Dela Rosa asin tulos na inabisuhan an senador na dae ‘magpakidnap’ asin imbes magpakanlong na muna ini sa Korte Suprema o iba pang local court sa nasyon.
Kan makuahan nin pahayag si Atty. Torreon na nagsisirbing legal counsel ni Dela Rosa, naaraman soboot kan abogado na an source ni Roque sa saiyang isinapublikong impormasyon iyo an gikan sa saro kaining amigo.
Siring man, nanindugan si Torreon na dae pa man ini makumpirmar. Paliwanag kan abogado, nagpadara sa saiya nin mensahe si Atty. Roque katakod sa warrant kontra sa saiyang kliyente.
Alagad huli dae pa man soboot makaulay ni Torreon an dating sekretaryo, nagtitinir soboot na second information pa man giraray an sayang pinagkukuanan nin impormasyon.
Kan haputon man ni Torreon an dating sekretaryo kun igwang confirmation, mayo man soboot maitaong confirmation sa saiya, sa ibong kan panggigiit ni Roque na igwang kumpirmasyon.Enot nang pinanindugan kan abogado na dae nagtatago an saiyang kliyente asin nagtitinir ini sa Pilipinas, sa ibong kan ibinunyag ni Ombudsman Jesus Crispin Remulla na warrant of arrest kontra sa saiya, sarong bulan na an nakakalihis.
Hurot ni Torreon, dapat malinaw kun pano an pagtrato kan gobyerno kan Pilipinas, enkaso man na igwa na talagang arrest order kontra ki Bato.
Kun matawan linaw an ipapautob na procedure soboot, asin igwang akmang implementing rules and regulation, bukas soboot an kampo kan senadr sa anuman na lakdang kan gobyerno.
