NAGA CITY- Apwera sa isla kan Boracay, kinumpirmar ngonyan kan Department of Tourism (DOT) Bicol na paramientras man na pinasarado an Sombrero Island na yaon sa Burias Island, Masbate huli sa mga nairehistrong pagbalgar.
Sa entrevista kan Bombo Radyo Naga ki Benjamin Santiago, regional director kan DOT Bicol, sinaysay kaini na kan nakaaging bulan nin Enero sana nakaabot sa saindang opisina an impormasyon na paramientras na pinasarado an Sombrero Island.
Nagkakapira suboot sa nagin pagbalgar kan nasambitang isla an kawaran nin business permit kan mga negosyanteng nag-ooperar kan mga resorts, pagbalgar sa waste disposal, mga illegal construction na dae nag-agi sa ebalwasyon kan gobyerno na nagreresulta sa pagkakaraot kan natural habitat kan mga pawikan na nagsusugok sa lugar.
Katakod kaini, tulos suboot na nag-gibo nin maninigong lakdang an DOT-Bicol para maresolbaran an nasambitang problema.
Dugang pa ni Santiago, kinakaipuhan na mag-utob muna sa regulasyon na pigpapautob kan gobyerno an mga negosyante sa isla antes na liwat na bukasan sa mga local asin foreign tourist.
