Sinaysay ni Ombudsman Jesus Crispin Remulla kan nakalihis na Biyernes, Oktubre 10 na mawot kaini nin sarong espesyal na dibisyon sa Sandiganbayan na maglilitis sa gabos nin mga kaso na may koneksyon sa soboot mga anomalya sa mga proyekto sa flood control.
Sa enot na aldaw kaini sa opisina, isiniwalat ni Remulla na makikipag ulay ini ki Sandiganbayan Presiding Justice Geraldine Faith Econg sa masunod na semana tangani maghagad nin “continuous trial” sa mga flood control projects-related cases asin siertuhong mayong pagkauktaba sa paglilitis sa mga kasong ini na pigkokonsderar kaining “complicated” na mga kaso.
Alagad pigurot ni Remulla na mawot kaining plantsahon paramientras an mga nakabinbing kaso sa Ombudsman antes na magsunad kan sakdal kontra sa mga imbwelto na personalidad na kadaklan iyo an mga haralangkaw na inhinyero gikan sa Department of Public Works and Highways (DPWH) asin man mga kontratista, kabali na an pinakapabistong si Cezarah “Sarah” Discaya.
Nagsunad si Public Works Secretary Vince Dizon nin graft asin man malversation sa paagi kan falsification charges kan nakalihis na bulan kontra sa mga inhinyero kan DPWH asin man mga kontratista sa mga salang proyekto sa first district engineering office sa Bulacan.
Inirekomenda man kan National Bureau of Investigation an parehong kaso alagad kabali an indirect bribery.
Sinaysay ni Remulla, an dating justice secretary, na kadaklan sa mga kasong irerekomenda kan NBI an pagtitibayon depende sa gabat kaini asin man kun gurano ini karikas maproseso.
