NAGA CITY – Maabot na sa labi 5,000 an numero kan mga stranded passenger sa manlaen laeng pantalan sa Bicol Region katakod kan mayong untok na bulos kan makusog na uran dara kan bagyong Urduja.
Sa nagunong impirmasyon kan Bombo Radyo Naga hale sa Office of the Civil Defense (OCD) Bicol, napag-araman na maabot na sa kabilugang 5,234 an stranded passengers hale sa 13 pantalan sa manlaen laeng parte kan rehiyon kun saen pinakadakol digdi an nairehistro sa Sorsogon na nag-abot na sa labi apat na libo.
Apwera sa mga stranded passengers, nasa 533 cargoes, 18 vessels, asin 19 motorbanca man an nairehistrong stranded kan Philippine Coast Guard Bicol.
Mientrastanto, huli sa kusog kan uran, nagkapirang banwaan naman sa probinsya ni Camarines Sur an naglangkaw arog na sana kan nagkapirang parte kan Garchitorena, Gainza, asin Presentacion.
Nagpuon naman an pagtupas kan daga sa Barangay Bulalacao sa banwaan nin Presentasyon.
Sa banwaan naman nin Garchitorena, maabot na sa 20 panilya an inibakwar kan mga otoridad huli sa paglangkaw kan lebel kan tubig urog na sa mga coastal areas.
Nag-abiso naman an mga otoridad sa mga residente na harane sa salog, kadagatan asin pamitisan kan mga bulod na magin preparado asin marigmat tangani na malikayan an mga dae nilalaomang insidente arog kan raot kan panahon.
