Pigsierto kan National Food Authority (NFA) Bicol sa publiko na igwa sindang bastanteng suplay kan bagas tanganing masimbagan an mga pangangaipuhan sa panahon kan kalamidad, kaibahan na an posibleng pag-aalburoto kan Bulkang Mayon.
Ini an tanganing masierto na mayong magigin kakulangan sa bagas kun enkaso magkaigwa nin pangangaipuhan an mga apektadong komunidad.
Sigun ki Assistant Regional Manager Julie Llenaresas, an NFA Bicol igwang presenteng imbentaryo na nag-aabot sa 104,237 sako kan bagas na nakaimbak sa saindang mga bodega sa manlae-laen na parte kan rehiyon.
Apwera pa digde, igwa man sindang 764,870 sako kan paroy na nakaimbak, na iyong saindang piggigiling tanganing magin bagas.
Dugang pa ni Llenaresas, piglalaoman nindang madugang pa an saindang suplay kan bagas huli sa padagos na pigsasagibong paggiling kan paroy.
An NFA Bicol an aktibong nakikipag-koordinar sa manlaen-laen na relief agencies tanganing magkaigwa nin koordinasyon sa pagsimbag sa mga pangangaipuhan kan mga mamamayan.
Sinda man preparadong magsimbag sa posibleng paglangkaw kan demand para sa bagas, orog na kun magkaigwa nin mas mahewas na epekto an aktibidad kan Bulkang Mayon.
Plano kan NFA Bicol na magluwas nin dugang na stocks kan paroy para sa milling tanganing masierto an bastanteng suplya kan bagas.
