Supply kan kuryente kan CASURECO II nasa yellow alert na; pagtipid sa kuryente, pangapudan kan pamayuhan kan ahensya

NAGA CITY – Presenteng nasa yellow alert an supply kan kuryente kan CASURECO II huli sa padagos na paghimpis kan supply kan kuryente kawsa kan halangkaw na demand huli sa labing init kan panahon.

Sa entrevista kan Bombo Radyo Naga ki Rinner Bucay, Spokesperson kan Casureco II, sinaysay kaini na basado sa pigpaluwas na advisory kan National Grid Corporation of the Philippines(NGCP), kun pag-uurulayan an supply nin kuryente, perming nakakabali an kooperatiba sa yellow asin red alert.

Boot sana kaining sabihon, enkaso yaon sa irarom kan yellow alert an Luzon grid, hababa an suplay o mahimpis an suplay kumparar sa mga ordinaryong aldaw asin mayong naeeksperyensyahang dry season.

Sa panahon na makalaog an ahensya sa yellow alert, boot sanang sabihon kaini na dapat na mag-andam an publiko na dakula an posibilidad na enkaso orog pang maglangkaw demand sa kuryente, posibleng umabot pa ini sa red alert status.

Enkaso man na maisairarom sa red alert magkakaigwa nin manual load dropping o magsasara an NGCP nin mga power substations kun saen temporaryong pupunduhon an suplay nin kuryente.

Ini man an sitwasyon kun sain maeeksperyensiyahan an pagkawara nin kuryente during peak load hours, kun saen nagpupuon ini nin aga hasta alas-10 o alas-11 nin banggi.

Dugang pa kan opisyal, pigbabantayan na ninda ini puon pa kan nakalihis na semana orog na puon kan maisairarom sa red asin yellow alerts sa Luzon, ini orog na ta mayo man nin planta kan kuryente an CASURECO II kun kaya an nakakapagmonitor digdi an NGCP.

Piglinaw man ni Bucay na baku sanang CASURECO II an igwa nin problema sa supply kan kuryente kundi an enterong Luzon, Visayas asin Mindanao.

Dugang pa kaini na kun hihilingon sana an sitwasyon kayang-kaya kuta kan suplay alagad an nangyari soboot igwa nin mga power-generating facilities na nagkaigwa nin emergency shutdown kun saen 18 digdi an nagsara kasuudma, Abril 24.

Pangapudan na sana kan opisyal sa mga konsumedores na perming isaisip an tamang pag-gamit nin kuryente asin dai pag-gamiton an mga appliances na makukusog sa kuryente pag peak load hours.