Liwat na pinahimutikan ninda Senador Joel Villanueva asin Jinggoy Estrada an pagkaka-imbwelto ninda sa soboot korapsyon sa mga flood control projects.
Kasunod ini kan rekomendasyon kan Independent Commission for Infrastructure (ICI) sa Office of the Ombudsman (OMB) na sunadan nin kasong plunder, bribery, asin iba pang reklamo nin korapsyon an duwang senador, huli soboot sa pag ako nin benepisyo gikan sa mga maanomalyang proyekto.
Pighurot ni Villanueva na mahihiling sa mga rekord kan Senado na puon pa sana, tutol na ini sa mga flood control projects. Sigun digde, ini mismo an naglantad asin naghahapot dapit sa mga proyektong ini na hasta sa ngunyan, dae pa man naipapautob.
Dugang pa kan senador, sasaro sana an testimonya ni dating DPWH District Engineer Henry Alcantara—na mayo ining kinaraman sa mga flood control projects.
Siringpaman, sinaysay ni Villanueva na hahalaton kaini an magigin aksyon kan Ombudsman asin masumiter nin pormal na simbag sa tamang panahon tangani man patunayan an saiyang kawarang-sala.
Mientrastanto, pighurot ni Estrada na mayo ining inako na ano man na pondo para sa mga flood control projects.
Pigsierto kaining preparado ining depensaran an sadiri asin mag agi sa sa ano man na proseso kan ley tangani patunayan na nagsasabi ini nin totoo asin man nagtitinir sa sa tungkulin komo lingkod-bayan.
Pigtawan duon pa ni Estrada na lilinigon kaini an saiyang pangaran asin bilog an saiyang tiwala na sa tamang panahon, matrayumpo an katotohanan.
