Ipinahayag ni Vice President Sara Duterte na isa na siyang ‘adopted daughter’ o ampon ng Lamut, Ifugao sa gitna ng kanyang pagbisita sa Northern Luzon, isang rehiyong matagal nang kilala bilang balwarte ng pamilya Marcos, habang nangunguna siya sa isang survey para sa posibleng 2028 presidential race.
Sa kanyang pagdalo sa Rambakan Festival sa Lamut, nagpasalamat si Duterte sa pagtanggap sa kanya ng komunidad kahit siya ay mula sa Mindanao. Ani niya, “Kahit ako ay nanggaling sa napakalayong siyudad sa Mindanao, hindi naging hadlang na ako ay tanggapin ninyo bilang isang anak ng Lamut, Ifugao.”
Nagbiro rin si Duterte na bibili siya ng lupa at bahay sa Lamut bilang pagpapakita ng kanyang pasasalamat sa lokal na komunidad. Ipinaabot din niya ang mensahe ng kanyang ama, dating Pangulong Rodrigo Duterte, sa patuloy na suporta at panalangin ng mga residente.
Sa survey ng WR Numero para sa posibleng 2028 presidential race, nanguna si Duterte sa 1,455 adult respondents na sinarbey noong Marso, na may 35.9 porsiyento ng boto. Sinundan siya ni Senator Raffy Tulfo (18.5%) at ni dating Vice President at Naga City Mayor Leni Robredo (15.7%), habang 19.4% ang hindi pa nakapipili.
