Aram baya nindo mga ka-Bombo napuli sa disgrasyo asin kasulo an paninigarilyo kan sarong lalaki sa India kan iapon kaini an sinuluan na palito kan posporo sa gilid kan dalan na igwa palan nin nagtagas na petrolyo.
Mahihiling sa kua kan CCTV camera an duwang lalaki na nakatindog sa bangketa sa luwas kan tindahan Anantapur District, asin saro sa sainda an nagsindi nin sigarilyo.
Alagad antes an insident, sarong nakaparadang motorsiklo sa lugar an piglipat kan maysadiri kan mapansin kaini na nabasa an puwesto na kinalalaogan kan saiyang behikulo.
Magin an saro sa duwang lalaki na nakatindog sa bangketa an garo napansin na an nag-agos na likido na petrolyo palan. Hasta sa nangyari na an dae piglalaoman na pag-apo kan lalaking nagsindi nin sigarilyo na an ginamit kaining posporo an pasiring sa likido na tulos nagliyab.
Inabot kan kalayo an sarong nakaparadang motorsiklo na bahagyang nasulo an gulong alagad pighali man tulos sa lugar. Alagad sa marekas kan pagkuriyat kan kalayo, pirang tindahan asib mga paninda an nadanyaran sa lugar.
Sa kamarhayang palad, mayo man nakulgan. Salbado man magin an lalaking nagsindi nin sigarilyo asin an saiyang kaibanan. Basado sa imbestigasyon, nanggikan an petrolyo sa lalaking nagbakal nin tingi sa sarong gas station asin nagtagas kaya napasiring sa gilid kan bangketa.
