Isinusulong ng mga grupo ng magsasaka at ng Makabayan Bloc ang House Bill 7735 na naglalayong magbigay ng ₱50,000 subsidiya sa produksyon sa bawat magsasaka sa bansa.
Sa panayam ng Bombo Radyo Naga kay Cathy Estavillo, Spokesperson ng Bantay Bigas, ibinahagi nito na layunin nitong matulungan ang sektor ng agrikultura na makabawi sa patuloy na pagkalugi at mapalakas ang seguridad sa pagkain sa loob ng dalawang taon nang hindi na umaasa sa malalaking utang.
Batay sa panukala, umaabot sa ₱16 hanggang ₱18 kada kilo ang gastos sa produksyon ng palay, kaya iginiit ng mga magsasaka na dapat itaas sa hindi bababa sa ₱20 kada kilo ang farmgate price upang matiyak ang sapat na kita. Sa ganitong antas ng presyo, inaasahang makakabawi ang mga magsasaka sa kanilang gastos at makakamit ang mas makatarungang kita sa kanilang ani.
Binigyang-pansin din ng mga grupo ang epekto ng mga polisiya sa importasyon, kabilang ang 60-day rice importation ban at ang pagbawas ng taripa sa imported na bigas mula 30% patungong 15%. Ayon sa kanila, hindi naramdaman ang benepisyo ng mga hakbang na ito sa presyo ng lokal na palay, at lalo pang naapektuhan ang merkado dahil sa pagdagsa ng imported na bigas.
Ipinunto rin ang limitasyon ng National Food Authority (NFA) sa pagbili ng palay, partikular ang 14% moisture content requirement, na nagiging hamon para sa maliliit na magsasaka na walang sapat na pasilidad sa pagpapatuyo at post-harvest. Kasabay nito, binigyang-diin ang epekto ng El Niño kung saan tinatayang 36% ng populasyon ang food insecure at umaabot na sa ₱3 bilyon ang pinsala sa agrikultura.
Nanawagan ang mga magsasaka ng mas malawak na direktang suporta tulad ng subsidiya, modernisasyon ng irigasyon, pagtatayo ng post-harvest facilities, at pagpigil sa land conversion at reclamation. Giit nila, mahalagang gawing prayoridad sa mga susunod na pambansang polisiya ang agrikultura upang matiyak ang sapat na produksyon ng pagkain at proteksyon sa kabuhayan ng mga magsasaka.
