Tinawang-duon kan Chairman Bukluran ng Manggagawang Pilipino na an pangangaipo para sa dakulang paglangkaw kan suweldo makalihis na tuyaw an pig-iimplementar na wage increase na suboot kulang para sa padagos na paglangkaw kan presyo kan mga basic commodities.
Sa intrevista kan Bombo Radyo Naga ki Leody de Guzman, Bukluran ng Manggagawang Pilipino Chairman, sinaysay kaini na an ₱85 na paglangkaw sa sweldo sa National Capital Region harayo sa ₱200 na paglangkaw na hinahagad kan mga trabahador asin kulang kun ikukumpara sa pigkakarkulong ₱1,312 na gastos sa pang-aroaldaw na pangangaipo kan sarong pamilya. Mas dakul pa suboot an mga trabahador huli ta mas hababa pa an sweldo sa mga probinsya huli sa eksistidong provincial rate.
Susog pa ki de Guzman an ₱85 dugang sa sahod, pang-insulto sa mga nagtitios na obrero.
Nangapudan si de Guzman na haleon na an provincial wage rate ngani na magkaigwa nin pantay na sueldo an mga trabahador sa bilog na nasyon. Nag-insistir siya na an sweldo dapat nakabase sa tunay na gastos sa pagbuhay asin bako sana sa kakayahan kan mga negosyo na magtao nin hababang sweldo.
Tinawan duon man ni de Guzman an pangangaipo na magmukna nin mas dakul na trabaho sa paagi kan pag-uswag kan lokal na agrikultura asin industriya tanganing dae mapiritan an mga Pilipino na mag-migrate sa ibang nasyon tangani sanang magkaigwa nin igong kita.
Segun sa labor leader, an tunay na sukol nin pag-uswag iyo an kakayahan kan mga namamanwaan na mamuhay nin disente gikan sa saindang ingreso. Nangapudan ini sa gobyerno na iprayoridad an kapakanan kan mga trabahador imbes an interes kan darakulang negosyo asin poderosong grupo.
