Nahiling na kan lado kan Bureau of Customs an gabos nin 12 na mga luxury vehicles na nakalista sa saindang search warrant sa St. Gerard construction company sa syudad nin Pasig.
Sinaysay ni Customs Commissioner Ariel Nepomuceno na kan nakalihis na banggi kan Martes, Setyembre 2 kan an mga lunadan an isinuko asin man presenteng nakaparada na sa compound kan St. Gerard Construction General Contractor and Development Corp’s sa Pasig City.
Kinababalihan ini kan mga lunadan na Rolls Royce Cullinan 2023, Bentley Bentayga, Mercedes Benz G-Class (Brabus G-Wagon), Mercedes AMG G 63 SUV 2022, Toyota Tundra 2022, Toyota Sequoia, asin Cadillac Escalade ESV 2021.
Mantang an tulong lunadan na Mercedes Benz G 500 SUV 2019, GMC Yukon Denali SUV 2022 (Gas), asin man Lincoln Navigator L 2024 an nasa authorized service centers huli ta pinapagibo an mga ini.
Gabos kan mga nasambitan ng mga behikulo an sinelyuhan asin ini an binabantayan kan mga tauhan kan Bureau of Customs mantang saindang sinusuri kun igwa man nin paglabag an maysadiri siring na sana kan dae pagbabayad nin bastante kan mga buwis asin nagkapirang mga dokumento sa mga imported na mga luxury cars.
Marurumdumang nakakua nin search warrant an lado kan BOC sa korte para sa berepikasyon kan 12 lunadan na tulos man nindang dinumanan an lambang mga harong kan maysadiri na si Sara Discaya alagad pagkaaga kan Setyembre 2 igwa nin duwa na sanang nahiling na nakaparada sa harong na nakalista sa warrant.
Huli man digde, pinatanidan kan BOC si Discaya na mahahampang ini nin mga reklamo kun dae mailuwas an mga lunadan na nakalista sa saindang search.
Pinasalamatan kan lado kan BOC an tulong mga ahensya siring na sana kan Department of Transportation (DOTr) – Land Transportation Office (LTO), Philippine National Police (PNP) – Eastern Police District (EPD), Highway Patrol Group (HPG), Philippine Coast Guard (PCG), asin mga barangay officials kan Bambang, Pasig City.
