Ikukundusir an duwa pang mahewasang rally kontra sa korapsiyon sa Oktubre 17 asin 21 sa syudad nin Maynila, sigun sa Kilusang Bayan. Isasagibo ini kan mga grupong nasa likod man kan isinagibong Trillion Peso March rally kan nakalihis na Setyembre 21.
Kabali digde an mga nag-organisa kan Baha sa Luneta rally na Taumbayan Ayaw sa Magnanakaw at Abusado Network Alliance (TAMA NA), asin iba pang mga organisasyon, siringpaman an Kilusang Bayan Kontra Kurakot na binibilog kan mga anti-corruption groups.
Sigun sa Kilusang Bayan, nagpepreparar na an mga grupo para sa mas mahewasang aksiyon sa mga masunod na adaw tangani magdagos-dagos an public pressure asin pangapudan nin paninimbagan katakod kan nagpapadagos na flood control asin corruption scandals. Papangenutan man kan mga grupong kajovenan an rally asin martsa sa Mendiola, Maynila sa Oktubre 17.
Sigun pa sa mga organizer, nagsayuma an mga kajovenan na magtuninong na sana mantang bilyun-bilyong kaban kan taumbayan an pighahabon, kaya man sainda soboot ipapaabot an saindang boses sa mga makapangyarihan.
Mientrastanto, an protesta man na ilulunsar sa Oktubre 21 an pangengenutan kan grupo kan mga paraoma gikan sa mga lugar na naapektaran kan baha.
Ikukundusir ini sa Liwasang Bonifacio tangani iprotesta an soboot lantarang “pagtatakop” sa isyu nin korapsiyon sa Kongreso asin sa Independent Commission for Infrastructure (ICI).
Maiba man digde an manlaen-laeng multisectoral organizations.
Sigun pa sa Kilusang Bayan, nag promisa soboot an mga grupo, kaiba an mga organizer nin mass action sa Oktubre 17, na ipagpapadagos an saindang koordinadong paghiro sa mga masunod na semana komo preparasyon sa sarong nationwide rally sa Nobyembre 30.
