NAGA CITY- Irido an duwang indibidwal makalihis pagbabadilon sa magkasuway na insidente sa probinsya kan Quezon. Binisto an mga lugadan na sinda Alyas Eligio, 43-anyos, residente kan Brgy.Manggalang 1 Sariaya, asin si Alyas Niño, 22-anyos, residente kan Purok 1, Brgy Malabanban Sur, Candelaria, Quezon.
Sa nagunong impormasyon kan Bombo Radyo Naga sa Quezon Police Provincial Office, napag-araman na mantang naglalakaw si alyas Niño, kan bigla na sanang mag-abot an suspek na binistong si Alias Tan-Tan, 26-anyos, residente man kan Brgy Malabanban Sur, gikan likudan ni alyas Niño. Digdi man, binadil kaini si alyas Niño, sa ibabang parte kan saiyang likod. Huli digdi, nagsapo nin tama kan badil si alyas Niño, na tolos man pigdara sa ospital para sa asistinsya medikal mantang tolos man na nagdulag an suspek makalihis isagibo an krimen dara an ginamit na badil. Personal na kaanggotan man an nahihiling na motibo sa krimen.
Mientrastanto, lugadan man si Alyas Eligio makalihis pagbabadilon kan dae pa nabibistong mga suspek sa Sariaya, Quezon. Sa inisyal na imbestigasyon kan mga otoridad, napag-araman man na pauli na si Alyas Eligio sa saiyang harong gamit an motorsiklo kan bigla na sana ining pagbabadilon kan dae pa nabibistong backrider kan sarong motorsiklo. Makalihis isagibo an krimen, tolos man na nagdulag an duwa sa dae pa maaraman na direksyon. Huli man digdi, nagsapo man nin lugad sa manlaen-laen na parte kan saiyang lawas si Alyas Eligion, na tolos man pigdara sa ospital para sa asistinsya medikal.
Sa ngunyan, nagpapadagos pa an pigsasagibong imbestigasyong kan mga otoridad siring man an pagsusug sa posibleng kinamomogtakan kan mga suspek sa duwang insidente.
